Serukamba aomba kuwekwa kodi mafuta ya kupikia kutoka nje.

 

Mkuu wa Mkoa wa Singida Peter Serukamba ameiomba Wizara ya Fedha kuweka kodi katika mafuta ya kula ya  kutoka nje ya nchi ili soko la mafuta ya ndani liweze kuimarika

Maombi hayo ameyatoa leo mbele ya Katibu Mkuu wa Chama Cha Mapinduzi CCM Daniel Chongolo wakati akiongea kwenye Mkutano wa Shina namba Tano uliofanyika katika Kata ya Iguguno Wilayani Mkalama Mkoa wa Singida.

Serukamba amesema Mkoa umeongeza  eneo la uzalishaji wa alizeti lakini soko la alizeti aliendani na uzalishaji kwa kuwa mafuta yanayoingizwa kutoka nje hayatozwi kodi jambo ambalo linawakatisha tamaa wakulima.

Aidha ameeleza kwamba mafuta yanayotoka nje hayatozwi kodi jambo ambalo limesababisha bei ya alizeti kushuka na wakulima kukata tamaa ya kuzalisha jambo ambalo linachangia viwanda vya mafuta kuzalisha chini ya kiwango. Alisema

Hata hivyo ametolea mfano wa kiwanda cha usindikaji wa mafuta ya alizeti cha Mount Meru kilichopo Mkoani hapo ambacho kinafanya kazi kwa asilimia 25 tu kutokana na upatikanaji mdogo wa mbegu za alizeti.

"Tumepewa jukumu la kuongeza eneo la uzalishaji wa alizeti jambo ambalo tumeshalitekeleza, changamoto yetu ni soko ambapo mafuta kutoka nje hayana kodi hivyo kuathiri soko la mafuta ya alizeti" Serukamba

Amesema ekari zaidi ya laki sita zitazalishwa katika msimu huu wa kilimo ambapo zaidi ya asilimia 44 za mafuta yatatoka Mkoani Singida hivyo kuomba kulinda soko la ndani ili wakulima waweze kunufaika.

Akijibu maombi hayo Katibu Mkuu Chongolo amesema atalipeleka kwa wahusika na anahakika litakuwa na majibu chanya kwa kuwa kazi ya chama hicho ni kuhakikisha kilimo kinawanufaisha wananchi.

"Hatuwezi kumnufaisha mkulima wa nje wakati mkulima wa ndani anapata tabu, haiwezekani kabisa hili nitashughulika nalo" alisema Chongolo.

Amesema Serikali imetoa mbegu na mbolea ya ruzuku kwa wakulima lengo likiwa ni kuwasaidia ki uchumi wananchi hivyo hatakuwa tayari kuona fedha zinatumika bila kufikiwa kwa malengo.

Mwanzo mwa mwaka jana Serikali iliamua kuondoa kodi kwenye mafuta ya kupikia kutoka nje ili kupunguza bei ya mafuta ambayo ilikuwa ipo juu sana.