Tuesday, November 13, 2018

MKOA WA SINGIDA WAANZA KUCHUKUA HATUA KATIKA KUKABILIANA NA HALI DUNI YA LISHE KWA WATOTO CHINI YA UMRI WA MIAKA MITANO.


  Mkuu wa Mkoa SINGIDA DKT. REHEMA NCHIMBI ameziagiza halmashauri zote za mkoa wa SINGIDA zihakikishe zinatenga bajeti ya mwaka wa fedha wa 2019/2020 kwa ajili ya masuala ya LISHE kwa kutumia mapato ya ndani kama hatua ya kukabiliana na hali ya udumavu hasa kwa watoto wenye umri chini ya miaka MITANO na wanawake wenye umri kati ya 15- 49.

Mkuu huyo wa mkoa wa Singida ametoa maagizo hayo mjini hapa, tarehe 12/11/2018 katika kikao kazi kuhusu ujumuishwaji wa afua za lishe katika mipango ya bajeti za mikoa na halmashauri kwa mwaka wa fedha wa 2019/2020.

Dkt. Nchimbi amesisitiza kuwa lishe bora katika jamii ni kichocheo cha maendeleo katika nyanja zote kama vile afya, kilimo, elimu, biashara na uchumi.

Ameeleza kuwa athari za lishe duni au utapiamlo zitakapodhibitiwa au kutokomezwa ndipo malengo ya maendeleo katika nyanja mbalimbali Kimkoa na Kitaifa zitaweza kufanikiwa kikamilifu.

Aidha amefafanua kuwa jambo la msingi ambalo wataalamu na jamii wanapaswa kulifahamu na kulizingatia ni ukweli kwamba lishe ni suala mtambuka na utapiamlo katika jamii ni matokeo ya mkusanyiko wa matatizo mengi.

Ametaja baadhi ya matatizo hayo kuwa ni mtindo wa maisha usiofaa, maradhi mbalimbali, kutokuwa na uhakika wa chakula, matunzo duni ya mama na watoto, mazingira machafu, umaskini wa kipato na machafuko ya kisiasa.

Kwa upande wake, Mkurugenzi wa TAMISEMI Bi. BEATRICE KIMOLETA akizungumza katika kikao hicho amekiri kuwa hali ya lishe katika baadhi ya mikoa nchini sio nzuri hivyo jitihada za makusudi zinatakiwa ili kuhakikisha tatizo hilo linakoma hasa katika kipindi hiki cha kuelekea katika uchumi wa kati wa viwanda.

Mkurugenzi huyo pia ameagiza masuala ya lishe yajadiliwe kwa kina katika vikao vyovyote vya maendeleo ngazi zote na kuhimiza ushirikishaji wa maafisa lishe katika ngazi za uandaaji wa bajeti kwa ajili ya utekelezaji wa afua za lishe.

MATUKIO KATIKA PICHA WAKATI KIKAO KIKIENDELEA








 
  

 


 
 


IMETOLEWA NA;
KITENGO CHA HABARI NA MAWASILIANO
OFISI YA MKUU WA MKOA
SINGIDA

RC SINGIDA AHIMIZA WATANZANIA KUNUNUA BIDHAA ZINAZOTENGENEZWA NA VETA KWA SABABU ZINAKIDHI VIWANGO KATIKA SOKO LA NDANI NA NJE YA NCHI.


Mkuu wa Mkoa wa Singida Dkt. Rehema Nchimbi amewahimiza Watanzania kununua na kutumia bidhaa zinazotengenezwa na Vyuo vya Ufundi Stadi (VETA) nchini ili kukuza uchumi na kuongeza fursa za ajira kwa Watanzania.

Mkuu wa mkoa wa SINGIDA ametoa wito huo katika Mahafali ya wanafunzi wa Chuo cha Ufundi Stadi RC Mission VTC wilayani Manyoni mkoani Singida alipokuwa akizungumza na wahitimu, wanafunzi, wazazi na viongozi mbalimbali wa Serikali ya halmashauri ya wilaya ya Manyoni waliohudhulia Mahafali hayo.

Dkt. Nchimbi katika mahafali hayo amesisitiza, Halmashauri zinapaswa kutambua maarifa na matunda ya vyuo vya ufundi stadi VETA kwa kutangaza bidhaa zao kwani zinatengenezwa kwa ufanisi na ubora unaotakiwa.

Mahafali ya wanafunzi wa Chuo cha Ufundi Stadi RC Mission VTC, Wilayani Manyoni mkoani Singida, yaliambatana na maonyesho ya bidhaa mbalimbali zinazozalishwa na  wanafunzi hao ikiwemo fanicha, nguo mbalimbali (batiki), pamoja na huduma za magari na umeme.

Kwa upande wao wahitimu wa chuo cha ufundi stadi RC Mission VTC wameiomba Serikali ya halmashauri ya Manyoni kuwatambua wanafunzi hao kwa kazi nzuri wanazofanya.

Jumla ya wanafunzi 49 wamehitimu mafunzo ya Ufundi Stadi kati ya hao wasichana waliohitimu ni 4, suala ambalo Dktr. Rehema Nchimbi amesema wasichana wanapaswa kutambua nao wanahaki sawa kama ilivyo kwa wanaume, na kuahidi kuwalipia ada wanafunzi wa kike 3 kwa fani ya umeme 1 na ufundi magari 2, ikiwa kama motisha kwa wengine.

MATUKIO MBALIMBALI KATIKA PICHA




   







 







     





IMETOLEWA NA;
KITENGO CHA HABARI NA MAWASILIANO
OFISI YA MKUU WA MKOA 
SINGIDA

Monday, November 05, 2018

MKOA WA SINGIDA WAWEKA MIKAKATI YA KUONGEZA UZALISHAJI WA ZAO LA ALIZETI KWA MWAKA 2018/2019


Serikali ya Mkoa wa Singida imeanza kuchua hatua katika kuhakikisha inaongeza maradufu uzalishaji wa zao la Alizeti ambalo ni zao mkakati la Mkoa huo kwa kuhakikisha upatikanaji wa mbegu bora katika msimu wa kilimo wa 2018/2019 ambazo zitasambazwa kwa Wakulima.

Akifungua mkutano wa Mkakati wa Upatikanaji wa Mbegu Bora za Alizeti kwa Msimu wa 2018/2019, Mkuu wa mkoa wa Singida Dkt. Rehema Nchimbi amesema moja ya mkakati wa Mkoa ni kuhakikisha Wakulima wote wa Alizeti wanapata Mbegu Bora na kwa wakati na kuondoa matumizi ya mbegu hasara.

"Mkoa wa Singida kufuatana na hali ya hewa na kiasi cha mvua inachopata na aina ya udogo wake zao kuu na ambalo limeibeba Singida na linaihakikishia kuibeba Singida kwa mabadiriko makubwa sana ya kiuchumi na maendeleo ya wananchi wake ni zao la Alizeti"

"Mkoa wa Singida umelima Alizeti kwa miaka mingi na ninawashukuru sana wananchi na ninawapongeza kwa namna ambavyo wamelipokea hili zao la Alizeti na wamekuwa wakilima na tunaona mabadiriko makubwa ya maisha ya Wananchi"

"Leo tumeona tukutane na wadau wote wanaohusika na kilimo cha alizeti ili tuweze kufanikiwa katika kufanikisha kilimo cha alizeti kinafikia malengo na makusudi na matazamio ya Serikali yetu ya Jamhuri ya Muungano wa Tanzania, kwamba tuweze kuzalisha mafuta ya kutosha ya chakula ili kupunguza kile kiwango cha kuagiza mafuta kutoka nje, ni lazima sisi wakulima wa Alizeti kutoka mkoa wa Singida na wadau wote tuwe pamoja"

"Mwelekeo wetu mkubwa ambao leo tunatoka nao hapa ni HAKIKISHO LA WAKULIMA WOTE WANAOLIMA ALIZETI KWANZA WANATAMBULIKA ILI kuwapatia mbegu bora" 

"Katika msimu huu ni lazima mbegu bora zipatikane na zimfikie kila mkulima ambaye atalima Alizeti msimu huu, hicho ndicho kilimo chenye tija na kilimo ambacho kitaitambulisha Mkoa wa Singida katika kilimo hiki cha alizeti" Amesema Dkt Nchimbi 

Dkt. Nchimbi ametaja mkakati mwingine ni kuhakikisha ununuzi wa Alizeti katika msimu ujao wa kilimo unafanywa na vyama vya Msingi vya Ushirika ili kuondoa au kupunguza tatizo la bei isiyo ya uhakika ya alizeti.

Amesema uzalishaji wa Zao la alizeti ukiongezeka utawezesha Viwanda vilivyopo mkoani Singida kufanya kazi kwa mwaka mzima ambapo kwa sasa viwanda vingi vinafanyakazi katika kipindi cha miezi sita tuu kutokana na kukosa malighafi.

Akizungumzia viwanda, Dkt. Nchimbi amesema kwa sasa mkoa una Viwanda 144 vya kusindika alizeti na vinahitaji zaidi ya tani 595,000 ili kukidhi mahitaji ya Viwanda hivyo.

Mkuu wa Mkoa wa Singida pia amewasisitiza wakulima kuchangamkia fursa za Mikopo kutoka kwenye Taasisi za kifedha ikiwemo TADB, NMB, CRDB, TPB na Vision Fund.

Kwa upande wao wakulima wa Zao la Alizeti mkoa wa Singida wameziomba Taasisi za kifedha kuwakopesha pembejeo hizo kupitia Taasisi zinazouza pembejeo hizo ili pindi watakapovuna na kuuza Zao hilo la Alizeti waweze kurejesha mikopo hiyo haraka kwani kwa sasa wakulima wengi hawana uwezo wa kununua pembejeo hizo kutokana na pembejeo hizo kuuzwa bei kubwa.

Kwa upande wao Shirika lisilo la Kiserikali FAIDA MALI limeihakikishia Serikali ya mkoa wa Singida kuwa mbegu zote bora za alizeti zinazohitajika kwa Wakulima wote wanaolima Alizeti mkoani Singida zitapatikana kwa msimu huu 2018/2019 na pia wameahidi kujenga magodauni ili kuleta mbegu ndani ya mkoa ili mbegu hizo  zimfikie kirahisi mkulima wa Alizeti.

Mkutano wa Mkakati wa upatikanaji wa mbegu bora za alizeti msimu wa 2018/2019 mkoani Singida ulifanyika katika ukumbi wa mikutano wa RC Social na kuhudhuriwa na waheshimiwa wakuu wa Wilaya, wakurugenzi wa Halmashauri, Mkurugenzi wa Shirika la FAIDA MALI, Wawakilishi wa Makampuni ya wasindikaji wa alizeti, Wawakilishi wa Makampuni ya pembejeo, Wawakilishi wa Vyama vya Ushirika, Wataalamu kutoka Sekretarieti ya Mkoa na Halmashauri pamoja na wawakilishi wa Wakulima wa Alizeti. 

MATUKIO KATIKA PICHA

Mkuu wa Mkoa wa Singida Dkt. Rehema Nchimbi akizungumza wakati wa Mkutano wa Mkakati wa Upatikanaji wa Mbegu Bora za Alizeti Msimu wa 2018/2019 mkoani Singida.


 Washiriki wa mkutano wakimsikiliza Mkuu wa Mkoa wa Singida Dkt. Rehema Nchimbi (hayupo pichani) akizungumza wakati wa Mkutano wa Mkakati wa Upatikanaji wa Mbegu Bora za Alizeti Msimu wa 2018/2019 mkoani Singida.


 Mwakilishi wa Wakulima kutoka Ilongero wilaya ya Singida vijijini akizungumza wakati wa Mkutano wa Mkakati wa Upatikanaji wa Mbegu Bora za Alizeti Msimu wa 2018/2019 mkoani Singida.




 Wauza pembejeo wakizungumza wakati wa Mkutano wa Mkakati wa Upatikanaji wa Mbegu Bora za Alizeti Msimu wa 2018/2019 mkoani Singida.


Mwezeshaji kutoka CRDB Bank akizungumzia fursa za mikopo zilizopo na mpango wa benki katika kuwasaidia wakulima kwa msimu 2018/2019 wakati wa Mkutano wa Mkakati wa Upatikanaji wa Mbegu Bora za Alizeti Msimu wa 2018/2019 mkoani Singida.

Wauza pembejeo wakionyesha Technolojia ya zana bora za kilimo wakati wa Mkutano wa Mkakati wa Upatikanaji wa Mbegu Bora za Alizeti Msimu wa 2018/2019 mkoani Singida.

IMETOLEWA NA;
Kitengo cha Habari na Mawasiliano 
Ofisi ya Mkuu wa Mkoa 
Singida