Thursday, December 31, 2020

KATIBU MKUU WIZARA YA AFYA AWATAKA WAZAZI, MAAFISA USTAWI KUWA KARIBU NA WATOTO WENYE MAHITAJI MAALUM

 Katibu Mkuu Wizara ya Afya, Maendeleo ya Jamii, Jinsia, Wazee na Watoto (Idara Kuu ya Maendeleo ya Jamii) Dk. John Jingu (aliyevaa miwani) akikabidhi bidhaa na chakula kwa viongozi na watoto wa Kituo cha Kulelea Watoto wenye Ulemavu Siuyu, Halmashauri ya Ikungi, mkoani Singida. 

KATIBU Mkuu Wizara ya Afya, Maendeleo ya Jamii, Jinsia, Wazee na Watoto (Idara Kuu ya Maendeleo ya Jamii) Dk. John Jingu, amewataka wazazi wanaoishi na watoto wenye changamoto za ulemavu wa aina mbalimbali kuwathamini sanjari na kuwapa matunzo stahiki katika malezi na makuzi yao.

Jingu aliyasema hayo alipotembelea na kutoa zawadi za bidhaa mbalimbali na chakula kwa watoto wa Kituo cha Walemavu Siuyu, Halmashauri ya Wilaya ya Ikungi, mkoani hapa leo.

“Wazazi wawathamini watoto bila kujali hali zao. Kuna baadhi wanawaleta watoto kwenye vituo na kisha kuwatelekeza…hii haikubaliki ni lazima tuzingatie haki za msingi za malezi na makuzi ya watoto hususani watoto hawa wenye ulemavu,” alisema Jingu

Aidha, aliwataka Maafisa Ustawi wa Jamii nchini kuongeza kasi ya kuhakikisha wanawatangamanisha watoto na wazazi wao-sambamba na jamii katika muktadha wa kubadili fikra, mtazamo ili kuleta ustawi wa watoto hususan wale wenye aina mbalimbali za ulemavu katika ngazi zote bila kubagua.

Kwa mujibu wa Katibu Mkuu, kituo hicho cha Siuyu ni miongoni mwa vituo vyenye sifa stahiki za utoaji wa huduma za malezi kwa watoto, ikiwemo usalama wa kutosha sambamba na walimu waliosomea elimu maalumu ya watoto wenye ulemavu, huku akiwataka viongozi wa vituo vingine nchini kuzingatia matakwa ya kisheria katika uendeshaji wa huduma za usajili wa vituo vyao

“Moja ya majukumu yetu ni kuvisajili na kuhakikisha vituo hivi vinafanya kazi sawasawa. Hivyo nimekuja hapa kutembelea kituo hiki kwa lengo la kukagua lakini nimeona pia nitoe zawadi kwa watoto hawa ambazo ni bidhaa na chakula,” alisema Jingu

Hata hivyo, Diwani wa Kata hiyo, Selestine Yunde, alimshukuru Katibu Mkuu kwa kutembelea kituo hicho huku akimsihi kuangalia namna ya uwezekano wa serikali kuanza kutenga bajeti za kuhudumia vituo hivyo.

Kwa upande wake, Mkurugenzi wa Kituo hicho, Padre Tom Ryan, alisema ziara ya viongozi wa serikali akiwamo Jingu hutafsiri faraja, ustawi na kuchagiza ustawi na furaha kwa watoto hawa. “Tunaona fahari kwa kutiwa moyo na hamasa kupitia zawadi hizi,” alisema.

Huku mmoja wa watoto wanaolelewa katika kituo hicho, Raymond Daudi, mbali ya kushukuru, aliomba mamlaka ndani ya serikali kuangalia uwezekano wa kuwasaidia watu wenye ulemavu, hususan wahitimu wa darasa la saba kwa kuwatengenezea mazingira ya kujipatia kipato badala ya kuwaacha bila ya msaada wowote.

Awali, akisoma taarifa ya kituo hicho, Kaimu Afisa Ustawi wa Jamii Mkoa wa Singida, Paul Sangalali, alisema kituo hicho cha Siuyu, kilichopo wilaya ya Ikungi mkoani hapa kilijengwa kwa ufadhili wa watu wa Ulaya na Marekani na kilifunguliwa Februari 2007 na aliyekuwa Mhashamu Askofu wa Jimbo Katoliki Singida, Desderis Rwoma.

Hata hivyo, Sangalali alisema mbali ya mafanikio yaliyopo, kituo kinakabiliwa na changamoto kadhaa zikiwemo uhitaji wa baiskeli kwa ajili ya watoto wenye ulemavu wa viungo, uhitaji wa chakula, sabuni, mashuka na fedha kwa ajili ya nauli ya kuwarudisha watoto nyumbani wakati wa likizo.

“Pia miundombinu yake sio rafiki sana hasa pale watoto wanapokuwa wakielekea shule ya msingi Siuyu, na kuna ushirikiano hafifu kwa wazazi kuchangia shilingi laki moja za huduma kwa kila mwaka…lakini watoto wanapokuwa likizo nyumbani hawapati mazoezi kwa wazazi hivyo wakirudi kituoni walimu hulazimika kuanza upya kufundisha,” alisema Sangalali.

          Dk. Jingu akifurahi kwenye picha ya pamoja na baadhi ya watoto wa kituo hicho.

Katibu Mkuu Wizara ya Afya, Maendeleo ya Jamii, Jinsia, Wazee na Watoto (Idara Kuu ya Maendeleo ya Jamii) Dk. John Jingu (kulia) akisalimiana na Mkurugenzi wa kituo hicho Padre Tom Ryan, muda mfupi baada ya kukabidhi bidhaa na chakula kwa viongozi na watoto wa Kituo cha Kulelea Watoto wenye Ulemavu Siuyu mkoani Singida.

Mwonekano wa moja ya Jengo la huduma ndani ya kituo hicho

Thursday, October 22, 2020

VIONGOZI WA DINI SINGIDA WATOA MAAZIMIO MAZITO SABA KUELEKEA UCHAGUZI MKUU

A.    Mwenyekiti wa Kamati ya  Amani ya  Viongozi wa Dini  na Madhehebu mbalimbali Mkoa wa Singida,(aliyesimama)Hamis Muhamed Kisuke akiongoza kikao ambapo walizungumzia  hali ya amani kuelekea Uchaguzi Mkuu wa Mwaka huu na kuja na maazimo saba. (Picha na Rose Nyangasa).   

MMkuu wa Mkoa  wa Singida Dkt. Rehema Nchimbi  akizungumza na  Kamati  ya Amani ya Viongozi wa Dini na Madhehebu  mbalimbali Mkoa wa Singida ambapo ameipongeza Kamati hiyo kwa kuamua  kuhamasisha amani na utulivu kwenye  kipindi cha Uchaguzi Mkuu wa mwaka huu (Picha na Rose Nyangasa).

A.      Wajumbe wa Kamati ya Amani Mkoa wa Singida wakimsikiliza kwa makini Kamanda wa Polisi wa MKoa wa Singida, Sweetbert Njewike (hayupo pichani) wakati akielezea majukumu ya jeshi hilo kwenye siku ya upigaji kura Oktoba 28, mwaka huu. (Picha na Rose Nyangasa).

Kamanda wa Polisi wa MKoa wa Singida, Sweetbert Njewike majukumu ya jeshi hilo kwenye siku ya upigaji kura Oktoba 28, mwaka huu. (Picha na Rose Nyangasa).


 John Mapepele na Rose Nyangasa, Singida

 Kamati ya Amani na Dini mbalimbali   Mkoa wa Singida inayojumuisha  viongozi wa madhehebu na dini zote   imetoa tamko lenye maazimio saba  kuelekea Uchaguzi Mkuu utakaofanyika Oktoba  28, mwaka  huu huku  ikiwaomba waumini wao kumtanguliza Mungu na Serikali  kusimamia  amani na utulivu ili kuwapata viongozi bora watakaoingoza  nchi katika miaka mitano ijayo 2020 hadi 2025.

Akisoma maazimio hayo, Mwenyekiti wa  Kamati hiyo Shehe, Hamis Muhamed Kisuke amesema  miongoni mwa maazimio hayo ni  kuwaomba waumini wao kutenga siku tatu kuanzia Ijumaa hadi Jumapili ya juma hili kwa ajili ya  kufunga na kuomba ili kuombea  uchaguzi upite  kwa  amani na usalama.

Maazimio mengine  yaliyofikiwa kwenye kikao hicho ni pamoja na  viongozi wa dini katika kipindi hiki kudumisha  Amani, kutotumika   kwenye majukwaani ya siasa kushabikia  viongozi wa vyama vya siasa, kuhubiri Amani,

kuhimiza waumini wao kushiriki kupiga kura na kuhimiza kufuata na kutii sheria za  nchi ambapo  pia wamesisitiza kuviacha vyombo  halali vilivyopewa dhamana  ya kusimamia  uchaguzi huo vifanye kazi yake.

Mwakilishi wa dini ya Kiislam (Baraza la Kiislam Tanzania) katika  Mkoa wa Singida Shehe, Issa Nassor amesema Amani  ikitoweka  watakaoumia  zaidi ni  watoto, wanawake, wajawazito, wazee na watu wenye  mahitaji maalum kwa kuwa  hawana  uwezo wa  kukimbia  na kujitetea.

Aidha,  wamewataka wazazi  na walezi wa kila familia  kuwaasa  vijana  kujiepusha  na kushawishiwa na watu wanaoitakia  mabaya  nchi ya Tanzania ambapo ameongeza  kwamba   baada ya  kupiga kura  vijana warejee  nyumbani  kwa  kuwa tayari Serikali imeshaweka  vyombo  maalum kwa ajili  kuhesabu na kutangaza matokeo hayo.

“Historia inaonyesha kuwa nchi zote duniani zilizopoteza amani ni nchi ambazo walilewa amani, vilevile tukumbuke kupata amani ni mchakao wakati  kuvunja amani  ni jambo rahisi  kabisa. Nawaomba watanzania wenzangu  kutumia  vipande  vyetu vya kupigia kura  kuwachagua  Viongozi bora” aliongeza  Shehe, Nassor

Mwakilishi kwa upande wa wakristo, Askofu wa Kanisa la TAG mkoani Singida, Gasper Mdimi amesema  amani  ya nchi ni jambo nyeti ambalo  linatakiwa  kuchukuliwa  kwa uangalifu mkubwa kwa kuwa  lina athari   pana  kuanzia  kwenye  ngazi ya  kaya  hadi taifa kwa ujumla  na kwamba  Bibilia imefafanua  kuwa chanzo cha Amani  ni  Mungu mwenyewe, Haki na Watu wanaomcha  Mungu.

Amefafanua kuwa  vitabu vyote  vitakatifu  vinasisitiza kutafuta  kuwa  na amani  na watu wote ambapo   na kwamba watanzania  wanatakiwa kupendana  katika kipindi hiki bila  kuangalia   vyama vyao  vya  Siasa   na kuiombea  nchi yao  ipate  viongozi ambao  watailinda amani.

Pia amesema   wakati  wananchi wanakwenda  katika siku za mwisho wa kuhitimisha zoezi la kuwachagua viongozi   ni  muhimu  kuzingatia kuacha kuongea  maneno ambayo yatasababisha machafuko na  uvunjifu wa amani.

Mwakilishi wa Mhashamu Baba Askofu wa  Jimbo  Katoliki la Singida, Padre Padri Elia Mnyakanka amesema Uongozi Bora ni tunu na zao  la amani  na kwamba  ili kuwa na maendeleo na ustawi  kuanzia ngazi ya familia na taifa ni muhimu kwa wananchi  kutafakari kwa kina  na kuwachagua viongozi wanaoweza kuilinda amani.

Akitoa mfano amesema katika taifa la Israel uongozi bora ulikuwa ni nyenzo ya kuwafikisha  kwenye nchi ya ahadi kupitia manabii mbalimbali ambapo kwa kufanya hivyo amani ilipatikana.

Amesema  viongozi wa dini wanapaswa  kuwapa elimu ya uraia waumini wao  ili kuwapa  uwezo  wa  kuwachagua wagombea makini  kupitia ilani zao ambapo amesisitiza  kwamba uchaguzi wa haki na amani ndiyo njia pekee ya kujitawala na kuleta amani katika nchi.

Kamanda wa Polisi wa Mkoa wa Singida,  Sweetbert Njewike  amesema kwenye kipindi hiki  cha uchaguzi majukumu yao  ni pamoja na  kutunza na kudumisha Amani, kusimamia utekelezaji wa sheria, kuzuia na kubaini makosa ya jinai, kuwakamata wahalifu wanaohatarisha amani na kuwafikisha katika vyombo vya sheria, kulinda  mali za raia, kutoa ulinzi kwa maafisa na vituo, pia kuhakikisha hakuna mtu anaye watishia wapiga kura na kuhakikisha usalama wa vifaa vya kupigia kura. 

Mkuu wa Mkoa Singida Dkt.Rehema Nchimbi amewashukuru viongozi hao kwa kuandaa mkutano  huu ambao umelenga kudumisha amani na kuwahimiza wananchi washiriki kikamilifu kupiga kura  ili kuwa chagua viongozi bora.

Aidha Dkt.Nchimbi amewataka Viongozi wa Dini kutotumika kuharibu amani na mshikamano ambao  upo kwa kipindi kirefu sasa hapa nchini kutokana na kazi nzuri  ya kusimamia amani hiyo iliyofanywa na Serikali.

Wednesday, October 21, 2020

RC SINGIDA -WAZEE NI BARAKA TUWATHAMINI

Manyoni

Mkuu wa Mkoa wa Singida, Dkt. Rehema Nchimbi ametembelea Kituo cha Wazee kwenye Kijiji cha Sukamahela  Wilayani Manyoni, Mkoani Singida    na kuwapatia  mahitaji ya vyakula yenye thamani ya takribani shilingi milioni mbili ikiwa ni zawadi ya Mkoa kwa ajili ya maadhimisho ya mwaka huu ambayo hufanyika  Oktoba Mosi kila mwaka. 

Akizungumza na Wazee waishio katika Kituo hicho, amesema mageuzi  na mapinduzi ya kiuchumi yaliofanywa na Selikari ya Awamu ya Tano ni  makubwa ambayo yanalenga  kuwanufaisha wananchi wake katika umri wa sasa hadi wanapokuwa wazee.

Ameyataja baadhi ya  maendeleo hayo kuwa ni pamoja na ujenzi wa Reli ya Mwendokasi, Ujenzi wa Bwawa la Mwalimu Nyerere  la kufua Umeme, utoaji wa elimu  bure kwa  wanafunzi, Ujenzi wa Vituo vya Afya na ununuzi wa ndege.

"Ndugu zangu tuna kila sababu ya kumshukuru Mungu na kumshukuru baba yetu Magufuli  kwa kuwa haya yote ni kwa ajili ya kukuza uchumi wa nchi yetu na kunufaisha kila mtu pamoja na Wazee wa sasa  na wajao. "Alisema Mkuu wa Mkoa.

Pia, aliwaomba Watumishi wa Mungu kuwaombea Wazee ambapo alisisitiza kuwa  Wazee ni baraka na kwamba tunajifunza mambo mengi  kutoka kwao.

"Familia zenye Wazee zina baraka na mimi nataka Mkoa wa Singida uwe na historia ya kuwa na Mzee mwenye miaka mingi kuliko wote duniani" aliongeza Dkt.Nchimbi.

Kwa upande wake Mwenyekiti wa Wazee wasiojiweza Ndugu, Andrea Yohana alimshukuru Mkuu wa Mkoa kwa zawadi ya mbuzi, nyama ya Ng'ombe Michele, Sukari pamoja na sabuni ya kufulia ya unga.

"Tunawashukuru kwa zawadi hii mliyotupatia Mungu awabariki na kuwaongezea mlipotoa na siku nyingine mtukumbuke zaidi" aliongeza

SERIKALI YABORESHA KOROSHO MKOANI SINGIDA

 Singida

Taasisi ya Utafiti wa Kilimo Tanzania (TARI) na Taasisi ya Utafiti wa Kilimo Naliendele(NARI) kwa kushilikiana na Bodi ya Korosho Nchini pamoja na Serikali  ya Mkoa wa Singida imeendesha mafunzo maalum ya kilimo bora cha zao la Korosho ili kufufua zao hilo ambalo limeonyesha kusitawi kwa kiwango kikubwa katika  Mkoa huo kutokana na hali ya kijografia ya eneo hilo.

Akiongea  kwa  niaba ya  ujumbe  maalum  wa  Taasisi hizo, ofisini kwa Mkuu wa MKoa wa Singida  Dkt. Rehema Nchimbi, Afisa Mfawidhi wa Bodi ya Korosho Kanda ya Kati Bw.Ray Mtangi amesema lengo kuu la mafunzo hayo ni  kuwawezesha wakulima kuingia sokoni wakiwa na Korosho zenye  uboro unaokubalika  katika masoko ya  kimataifa ili kupata bei nzuri.

Amesema mafunzo hayo yanatolewa katika wilaya zote za Mkoa wa Singida ambapo kwa sasa yameanzia Wilayani  Manyoni na yanasambazwa  katika wilaya  zote  kwa kuwa utafiti umebaini kuwa  eneo kubwa la mkoa huu linafaa kwenye kilimo cha zao la Korosho.

“Serikali imeona  ni muhimu kuelekeza nguvu zake  katika Mkoa huu  kwa kuwa  kilimo cha zao la Korosho kitakuwa  ni mkombozi wa kweli kwa wananchi wa Singida” alisisitiza Mtangi 

Pia Dkt.Geradina Mzena ambaye ni Mratibu wa zao Korosho nchini amewapongeza wadau mbalimbali ambao wameonyesha mwitikio mkubwa kutoka sehemu mbalimbali nchini kuhudhuria mafunzo  hayo ambapo amesema Serikali imejipanga kuhakikisha kuwa mafunzo hayo  yatatolewa  katika kanda  mbalimnali hapa nchini ili kuleta mageuzi makubwa  katika sekta  ya kilimo kwa ujumla

Aidha ameipongeza Serikali ya Mkoa wa Singida kwa  kuwa na mkakati kabambe  wa kuanzisha  mfumo wa  mashamba makubwa ya pamoja ya bega kwa bega ambayo yameifanya Singida  kuwa  miongoni mwa  mikoa ambayo ni wazalishaji wakuu wa zao hilo

Mkuu wa Mkoa wa Singida  Dkt.Rehema Nchimbi amefafanua kuwa  hadi sasa kuna takribani ekeli 26,000 za zao la korosho ambazo zimelimwa katika Wilaya ya Manyoni, Ikungi na Itigi ambapo amesema kwa sasa serikali imesitisha ugawaji wa  mashamba ya  pamoja  kwenye wilaya ya Manyoni kwa  vile  tayari eneo kubwa  limetolewa

“Napenda kufafanua kwamba  kwa sasa   tumesitisha  ugawaji wa mashamba ya Manyoni  kwa vile eneo lote la mkoa wetu linafaa kwa kilimo hicho hivyo wananchi wanaopenda  kulima watapatiwa maeeneo hayo sehemu nyingine na kwamba  mashamba hayo ni maalum kwa ajili ya zao hilo pekee” aliongeza Dkt. Nchimbi 

Pia amesema Mkoa wa Singida ulikuwa ukisifika kwa sifa ya ukame lakini jitihada zilizofanywa na  Serikali ya Awamu ya Tano  kupitia tafiti mbalimbali zilifanya utafiti wa zao la kudumu katika Mkoa huu  kwa kuwa kulikuwa na viashilia vya mikorosho mizee hivyo ndio vilikuwa viashilia vya kugundua kuwa Korosho inastawi Singida.

Mkurugenzi wa Idara ya Maendeleo ya Mazao kutoka Wizara ya Kilimo Nyaswebwa Chimagu amesema Wizara itaendelea kutoa Sera ambazo zitatasaidia  kuleta mapinduzi ya  sekta ya kilimo ili kuhakikisha kiliomo kinachangia kwenye uchumi wa Taifa na kwamba  wananchi wajitokeze kwa wingi kwenye zoezi la uelimishaji linaloendelea.

"Wito wetu kama Serikali na Wizara kwa ujumla watu waje wajifunze katika maeneo haya juu ya kilimo cha korosho" alisisitiza  Chimagu

UN YAMUUNGA MKONO MAGUFULI KUTOKOMEZA UKATILI WA MWANAMKE IKUNGI

 Ikungi - Singida

Mkuu wa  Mkoa wa Singida Mhe, Dk. Rehema Nchimbi  amezindua  miongoni mwa miradi mikubwa iliyowahi kutekelezwa nchini, mradi wa  pamoja  baina ya Mashirika ya Kimataifa ya UN Women na UNFPA kupitia ufadhiri  wa  Shirika la KOICA wa “Tuufikie usawa  wa jinsia kupitia kuwawezesha wanawake na wasichana” utakaogharimu takribani bilioni 11.5 za kitanzania  ambao utatekelezwa  katika Wilaya ya Ikungi mkoani Singida na Msalala mkoani  Shinyanga katika kipindi cha  miaka mitatu kuanzia sasa.

 Dk. Nchimbi amesema lengo kuu la mradi huo ni kuchangia  katika kuwawezesha  wanawake na wasichana  kuwakwamua kiuchumi na kijamii katika mikoa ya Singida na Shinyanga  ili kufikia usawa wa kijinsia ambapo amewataka watendaji wote wa Serikali ambao watatekeleza mradi huo kuwa makini katika utekelezaji wa mradi ili  malengo ya mradi huo yaweze kufikiwa.

Amesisitiza kuwa Serikali haitasita kuwachukulia hatua kali watendaji ambao  kwa namna moja au nyingine hawataendana na kasi ya utekelezaji wa miradi chini ya Serikali ya awamu ya Tano  inayoongozwa na Rais John Pombe Magufuli ambapo amesema  mrai huo  ni sehemu ya utekelezaji wa Ilani ya Chama cha Mapinduzi  ili kuwaletea wananchi  maendeleo ya  kweli.

Kwa mujibu wa  Mkurugenzi wa  KOICA  Tanzania, Bi Jieun Mo,  walengwa wasio wa moja kwa moja takribani  wakazi 40,000 kutoka kwenye wilaya  ya Ikungi na Msalala na walengwa  wa moja  kwa moja 2350 wanawake na wasichana  kutoka katika wilaya hizo watanufaika na mradi huu ambapo pia  wanaume na wanawake 6000 wa Wilaya  ya Ikungi watanufaika kwenye eneo la muingiliano wa  hati za ardhi.

Mo ameainisha kuwa  shughuli za mradi katika kuwaweza wanawake  kwenye eneo la uchumi zitajikiza zaidi kwenye kuimarisha uwezo wa wanawake  na vijana   wakulima ili waweze kutumia  njia nzuri za kilimo na hali ya hewa katika uzalishaji wa alizeti na kilimo cha bustani, kukuza uuzaji wa pamoja, ujuzi wa ujasiriamali na wakala wa uchumi  wa wanawake  na kuimarisha  usalama wa ardhi na umiliki.

Amesisiza kuwa  shughuli hizo zitatekelezeka  kupitia kuunda  vikundi vya uzalishaji wa kilimo cha bustani kwa wanawake, kuunganisha  wanunuzi wa vikundi  vya wakulima vya wanawake,kusaidia ujenzi wa  ghala kubwa  moja la alizeti na kituo cha ukusanyaji kilomo cha bustani ili  kuboresha uuzaji wa pamoja na utunzaji baada ya kuvuna, kutoa mafunzo ya ujasiriamali, kutoa mafunzo ya ujasiriamali na ufikiaji wa habari za kifedha na kufuatilia ushauri wa usimamizi wa biashara na  fedha na kukuza  umiliki wa ardhi pekee na wa pamoja  wa wanawake kupitia utoaji wa  Hati za Haki za kimila za Makaazi(CCROs).

Mwakilishi wa UN Women  Bi, Hodan Addou ameishukuru Serikali  ya  Tanzania  kuwa ushirikiano wake katika kuhakikisha  kuwa mradi huu  hatimaye umeanza kutekelezwa ambapo amesema Shirika lake  linaunga mkono juhudi za Serikali za kumkomboa mwanamke ili kuondokana na  unyanyasaji wa kijinsia.

Bi Addou amesisitiza kuwa mradi utasaidia uwezeshaji kijamii kwa kuwawezesha  wanawake kusimamia haki zao, kujenga ujuzi wa ujasiiamali wa wanawake na wasichana kukabiliana  na unyanyasaji wa kijinsia na kuimarisha mifumo ya kuzuia na kukabiliana na unyanyasaji wa kijinsia kupitia kuanzisha na kuandaa vifaa katika madawati matatu ya  Polisi ya Jinsia na Watoto, kuanzisha  vituo vitatu vya  huduma  ya dharura katika  vituo vya wilaya, kuunda nafasi salama ya umma, kujenga uwezo  wa nambari ya msaada ya watoto kitaifa, kuunda na kuimarisha Klabu za Wasichana na kuunda Kamati za ulinzi na ukatili dhidi ya wanawake na watoto.

Kwa upande wake Mwakilishi Mkazi wa Umoja wa Mataifa Nchini Tanzania  Zlatan Milisic   ameipongeza Serikali kwa kuwa  na mradi huo na kuongeza kuwa mradi huo unaendana na malengo ya endelevu ya 2030 hususani lengo namba 5 kuhusiana kuwaendeleza wanawake  katika nyanja mbalimbali na kuongeza kuwa mwaka 2020 ni mwaka muhimu sana kwa kuwa tunaelekea  katika kutimiza miaka 25 ya azimio la wanawake la Beijing.

Ameeleza kuwa  malengo endelevu ya 2030 yameeleza kuwa ili kufikia maendeleo ya nchi kumtambua mwanamke ni jitihada muhimu sana  katika kuharakisha na kutimiza malengo yote ya maendeleo ambapo ameihakikishia Serikali ya Tanzania kuendelea kufanya kazi kwa karibu sana  ili kuhakikisha wanawake wanakuwa chachu ya maendeleo katika  nchi ya Tanzania.

Mwakilishi wa UNFPA, Dk. Winfred amesema kuwa uzinduzi wa mradi umelenga kutokomeza aina zote za unyanyasaji wa kijinsia  na kuimarisha usawa katika jamii ikiwa ni pamoja na  kuimarisha maisha ya wanawake ambapo amesisitiza kitovu cha matatizo ya kijinsia  ni wanaume na mila na desturi potofu zinazomtazama mwanamke kwa kumdharirisha hivyo juhudi za makusudi  zinatakiwa  kufanywa za kuwaweka wanaume mbele ili kutokomeza unyanyasaji wa kijinsia kwa wanawake.

Naye  Mkuu wa Wilaya ya Ikungi Edward Mpogolo  amesisitiza kuwa kazi nzuri zinazofanywa na  Rais John Pombe Magufuli katika Nyanja mbalimbali ndiyo zinazoyafanya  jumuiya za kimataifa  kuunga mkono kwa kutoa  misaada  kupitia miradi mbalimbali hapa nchini.

Tuesday, December 03, 2019

NAIBU WAZIRI WA KILIMO, OMARY MGUMBA AFANYA ZIARA YA KUKAGUA MIRADI MBALIMBALI YA KILIMO MKOANI SINGIDA.

 Naibu Waziri wa Kilimo Omary Mgumba akisalimiana na Viongozi mbalimbali wa Wilaya ya Singida DC mara baada ya kuwasili kwa ajili ya kuanza ziara ya kikazi ya kukagua miradi mbalimbali ya Kilimo Mazao, kilimo cha umwagiliaji na mfumo wa masoko wa mazao ya wakulima kupitia ushirika, mkoani Singida.

Naibu Waziri wa Kilimo Omary Mgumba akikagua bonde la Ntambuko lililopo kijiji cha Kinyeto wakati wa ziara yake ya kikazi mkoani Singida.

Naibu Waziri wa Kilimo Omary Mgumba akizungumza na wakulima (hawapo pichani) wanaotekeleza kilimo cha umwagiliaji kwenye bonde la Kinyeto Ntambuko Singida vijijini.

 Muonekano wa bwawa la Msange lililopo Singida vijijini. 

 Mwenyekiti wa halmashauri ya wilaya ya Singida vijijini Elia Digha (kushoto) akimuonesha Naibu Waziri mradi wa skimu ya umwagiliaji unaotekelezwa kwa tija kubwa ya wakulima wa kata ya Msange mkoani Singida. 
 Naibu Waziri wa Kilimo Omary Mgumba akikagua shamba la vitunguu vinavyolimwa kupitia teknolojia ya umwagiliaji kwa njia ya matone katika kijiji cha Msange mkoani Singida.

 Mkurugenzi wa kiwanda cha kukamua alizeti cha Simai, Juma Mene (kulia) akizungumza na Naibu Waziri wa Kilimo Omary Mgumba alipotembelea kiwanda hicho kilichopo Mtinko Singida DC.

 Mbunge wa jimbo la Singida Kaskazini Justine Monko akizungumza na wananchi wa AMCOS ya Ughandi wanaojishughulisha na kilimo cha pamba muda mfupi kabla ya kumkaribisha Naibu waziri wa Kilimo.

 Naibu Waziri wa Kilimo Omary Mgumba akizungumza na wananchi wa AMCOS ya Ughandi wanaojishughulisha na kilimo cha pamba halmashauri ya wilaya ya Singida vijijini wakati wa ziara yake.


 Meneja wa Uhusiano na Utumishi wa kiwanda cha Mount Meru Singida Bw. Nelson Mwakabuta akisoma taarifa fupi ya kiwanda hicho mbele ya Naibu Waziri wa Kilimo Omary Mgumba muda mfupi baada ya kutembelea kiwanda hicho wakati wa ziara yake mkoani Singida.

 Mkurugenzi wa kiwanda cha Singida Fresh Oil Mill, maarufu Kilimo Kwanza, Khalid Ally  Omary akimuonesha Naibu Waziri wa Kilimo Omary Mgumba (katikati) aina ya mbegu mbalimbali za alizeti zinazofaa kwa uzalishaji bora wa mafuta ya kupikia. Kushoto ni Mbunge wa jimbo la Singida Kaskazini, aliyemwakilisha mbunge wa Singida Mjini Mussa Sima.


Mkutano ukiendelea

 Naibu Waziri wa Kilimo Omary Mgumba akiangalia sehemu ya uzalishaji unaofanywa na kiwacha cha kukamua alizeti cha Singida Fresh Oil Mill, maarufu Kilimo Kwanza wakati wa ziara yake.

Mkurugenzi wa kiwanda cha kukamua mafuta ya alizeti cha Choice Kindai, Bi. Amina Dang’ati akimuonesha Naibu Waziri wa Kilimo Omary Mgumba sehemu ya uzalishaji unaofanywa na kiwanda hicho, ikiwa ni sehemu ya ziara ya kikazi ya Mheshimiwa Mgumba mkoani Singida.

 Naibu Waziri wa Kilimo Omary Mgumba (watatu kutoka kushoto waliosimama) akiwa katika picha ya pamoja na wafanyakazi na uongozi wa kiwanda hicho. (kushoto waliosimama ni Mbunge wa Singida Kaskazini Justine Monko).

Kwa habari zaidi tembelea: http://www.singida.go.tz