SUALA LA KUTENGENEZA FAMILIA BORA NI SUALA LA KILA FAMILIA.

Katibu Tawala mkoa wa Singida Dkt. Fatuma Mganga, amewasihi wazazi mkoani humo kutimiza wajibu wao kila mmoja katika familia ili kuwa na jamii bora kwa maendeleo bora ya taifa letu.

Kauli hiyo ameitoa leo (tarehe Mei 15, 2024) wakati wa Kongamano la siku ya Familia Duniani lililofanyika kimkoa katika kata ya Ibaga wilayani Mkalama na kuhudhuriwa na viongozi mbalimbali wa Serikali, vyama vya siasa, dini pamoja na wananchi.

“Kila mmoja atimize wajibu wake, tusaidiane, tushirikiane tuweze kulea familia vizuri, lakini pia tusilee watoto wetu kama mayai, tufuatilie mienendo ya watoto wetu, suala la kutengeneza familia bora si suala la Serikali, ni suala la kila familia. Wazazi tutimize wajibu wetu tusiwachekee watoto wetu” Dkt. Fatuma Mganga

Katibu Tawala huyo wa Mkoa amesema, Baba ni kichwa cha familia hivyo wanalojukumu kubwa la kusimamia familia kikamilifu kwa kuchukua nafasi zao katika familia ili kuiwezesha familia kuwa na bora nay a kuigwa ndani ya jamii.

Awali akiwasilisha hoja kuhusu chanzo cha familia nyingi kuvunjika, Mkuu wa Wilaya ya Mkalama Mhe. Moses Machali, amesema kukosekana kwa uwazi baina ya wana ndoa kunapelekea ndoa nyingi kuwa na migogoro.

Ushirikishwaji katika familia ni muhimu kwakuwa panapokosekana ushirikishwaji kunaleta migogoro ambayo inapelekea familia kutengana hivyo amewasi wanafamilia kuwa na tabia na maadili mema sambamba kwa kufanya kazi kwa bidii ili kujiongezea kipato na kumudu mahitaji ya familia.

“Kama ni kulima, Baba lima sana kama ni Mama fanya kazi za kuongeza kipato cha famili, kazi ya kutunza familia ni jukumu letu sote. DC Machali