SINGIDA KUANDAA WASIFU WA VVU NA UKIMWI KUIMARISHA MAPAMBANO DHIDI YA MAAMBUKIZI MAPYA

Na Glory Kimaro,

"Tunataka kuandaa wasifu wa Virusi vya Ukimwi (VVU) na UKIMWI wa Mkoa wa Singida ambao utakuwa na manufaa makubwa kwa jamii ya Singida na Tanzania kwa ujumla,"

Hayo yamesemwa na Kaimu Katibu Tawala wa Mkoa wa Singida, Bw. Stanislaus Choaji, wakati wa ufunguzi wa kikao cha kuandaa wasifu wa VVU na Ukimwi kilichofanyika katika Ukumbi wa Ofisi ya Mkuu wa Mkoa wa Singida.

Akizungumza katika ufunguzi Bw. Choaji amepongeza jitihada za kuandaliwa kwa wasifu huo mkoani Singida na kutoa wito kwa washiriki kutoa ushirikiano akisisitiza kuwa wasifu huo utatoa taarifa za kina kuhusu mwenendo wa maambukizi, kuongoza maamuzi yanayozingatia takwimu na ushahidi, kubaini mapungufu yaliyopo katika utoaji huduma, kupendekeza afua stahiki, kusaidia uhamasishaji wa rasilimali, pamoja na kurahisisha ufuatiliaji na tathmini kimkoa.

Naye Mratibu wa TACAIDS Kanda ya Kati, Bw. Ericko Kawanga, ameeleza kuwa uratibu madhubuti wa masuala ya UKIMWI unahitaji tathmini ya hali halisi ya eneo husika ili kuchukua hatua stahiki za kudhibiti maambukizi mapya na kuzuia vifo.

Bw. Kawanga amebainisha kuwa kiwango cha maambukizi mkoani Singida kimeshuka kutoka asilimia 3.6 (katika utafiti wa mwaka 2016/2017) hadi kufikia asilimia 3.0 (mwaka 2022/2023).

Ameongeza kuwa takribani watu 29,000 wanaishi na VVU kati ya wakazi zaidi ya milioni 2 katika mkoa wa Singida, jambo linalothibitisha kuwa jitihada za kupambana na maambukizi mapya zinaendelea kuzaa matunda.

Amesema, kuandaa wasifu huo kutawezesha mkoa kutathmini ulipotoka na unakokwenda, ambapo katika mchakato huo wadau wataangazia masuala ya upimaji wa hiari, kuzuia maambukizi kutoka kwa mama kwenda kwa mtoto, ufuasi wa matumizi ya dawa za kufubaza virusi (ARVs), pamoja na kupiga vita unyanyapaa.

Mchakato huo unatekelezwa na Mkoa wa Singida kwa kushirikiana na Tume ya Kudhibiti UKIMWI Tanzania (TACAIDS), Wizara ya Afya, pamoja na Ofisi ya Rais - TAMISEMI, ukiwa ni nyenzo muhimu ya kimkakati katika kuimarisha mapambano dhidi ya maambukizi mapya na kuboresha utoaji wa huduma za afya kwa wananchi.

MAENDELEO YA KIUCHUMI NI CHACHU YA USALAMA WA TAIFA – MJ. JEN. MKANDE

Maafisa wakufunzi waelekezi na wanafunzi wa kozi ya ukamanda na unadhimu kundi la 41/2026 wamefanya ziara ya kimafunzo mkoani Singida leo Oktoba 12, 2026 kwa kutembelea ofisi ya mkuu wa mkoa na kupata mhadhara kuhusu mada inayosema 'Uhusiano wa shughuli za kiuchumi na Ulinzi wa Taifa'.

Akizungumza wakati wa mapokezi ya ugeni huo, Mkuu wa Wilaya ya Singida, Mhe. Godwin Gondwe, akimwakilisha Mkuu wa Mkoa wa Singida, Mhe. HalimaDendego, amesema ugeni huo upo mkoani Singida kwa ajili ya kujifunza masuala mbalimbali yanayohusu usalama, ikiwemo usalama wa chakula, shughuli za uzalishaji kupitia ujasiriamali na viwanda vikubwa, kilimo, ufugaji, ajira kwa vijana pamoja na fursa mbalimbali za kiuchumi.

Mhe. Gondwe ameongeza kuwa ziara hiyo pia imemulika mchango wa lugha ya Kiswahili kama mhimili mkuu wa amani, umoja na ushirikiano unaowaunganisha Watanzania. Aidha, amebainisha kuwa Mkoa wa Singida kwa sasa unazingatia uzalishaji wa mafuta ya kula ya kutosha ili kuunga mkono ajenda ya kitaifa, sambamba na kuweka mikakati bora ya kuwawezesha wajasiriamali wadogo wadogo sambamba na kuwajengea vijana misingi ya kujituma na kuipenda nchi yao.

Mkuu wa Msafara huo, Mkuu wa Chuo cha Ukamanda na Unadhimu Tanzania, Meja Jenerali Steven Mkande, ameeleza kuwa ziara hiyo inalenga kuwajengea uwezo wanafunzi na wakufunzi katika upangaji wa mikakati na mipango ya kijeshi, kwani programu za masuala ya kijeshi zinahusiana moja kwa moja na ulinzi na usalama wa Taifa.

Jenerali Mkande amefafanua kuwa kaulimbiu ya mafunzo hayo kwa mwaka huu inalenga maendeleo ya kiuchumi kwa ajili ya usalama wa taifa, na ziara hiyo ni sehemu ya mafunzo ya vitendo kwani wataweza kutembelea miradi mbalimbali ikiwemo viwanda. 

Vilevile ameongeza kuwa, ziara hio inasaidia kupata uelewa mpana wa namna shughuli za kijamii na kiuchumi zinavyoweza kuathiri usalama wa taifa na mazingira, huku wakitathmini fursa zilizopo mkoani Singida kwa kuzingatia idadi ya watu katika sekta za kilimo na ufugaji, pamoja na kuainisha mambo yanayoweza kuathiri usalama kama vile ukosefu wa ajira na umaskini.

Ziara hio ya kimafunzo inatazamiwa kuendelea katika maeneo mbalimbali ya mkoa wa Singida, ikiwa ni sehemu ya mikakati ya chuo hicho cha kijeshi kuwajengea uwezo wa kina maafisa wakufunzi na wanafunzi wa kozi ya ukamanda na unadhimu katika kuunganisha masuala ya maendeleo ya kiuchumi na ulinzi wa amani nchini na duniani kote.