MIKOPO YA 10% KUONGEZA UWEZO WA KIUCHUMI NA AJIRA KWA WANANCHI

Na Glory Kimaro

Katika kuhakikisha wananchi wananufaika na mikopo ya asilimia 10 ya mapato ya ndani ya halmashauri, Katibu Tawala Mkoa wa Singida, Bw. Rodrick Mpogolo, amezitaka halmashauri kuhakikisha fedha hizo zinatengwa na kutolewa kwa walengwa kwa wakati, ili kuwawezesha wanawake, vijana na watu wenye ulemavu kuanzisha, kuimarisha na kupanua shughuli za uzalishaji mali, kukuza ujasiriamali na kuongeza fursa za ajira.

Wito huo ameutoa leo Novemba 6, 2026, wakati akiongoza kikao kazi cha Kamati za Uratibu na Usimamizi wa Mikopo ya 10% kwa Mkoa, Halmashauri ya Wilaya ya Singida na Manispaa ya Singida, kilichofanyika katika Ukumbi wa Vikao na Mikutano wa Ofisi ya Mkuu wa Mkoa wa Singida.

Akieleza mafanikio ya utekelezaji wa mpango huo, Bw. Mpogolo amesema Mkoa wa Singida umeweza kutoa zaidi ya Shilingi bilioni 5.3 kwa vikundi 536 vya wanawake, vijana na watu wenye ulemavu katika mwaka wa fedha 2025/2026. Aidha, katika robo ya kwanza ya mwaka wa fedha 2026/2027, zaidi ya Shilingi bilioni 1.3 kati ya Shilingi bilioni 1.9 zilizopangwa zimetolewa kwa walengwa.

Aidha Bw. Mpogolo amesisitiza kuwa mikopo hiyo ni mtaji wa maendeleo unaopaswa kuleta matokeo halisi kwa wanufaika, hivyo amezitaka halmashauri kuhakikisha hakuna fedha zinazobaki bila kutolewa, vikundi vinavyoachwa nyuma wala mikopo inayopoteza malengo kutokana na usimamizi dhaifu. Vilevile, amewataka wataalamu kufanya tafiti na kubaini miradi endelevu inayozingatia fursa na mazingira ya kiuchumi ya walengwa, sambamba na malengo ya Dira ya Taifa ya Maendeleo 2050.

Kwa upande wake, Mkuu wa Kitengo cha Maendeleo ya Jamii Mkoa wa Singida, Bw. Patrick Kasango, amesema kikao hicho kinalenga kuwakumbusha wataalamu majukumu yao, kubadilishana uzoefu na kuimarisha uratibu na usimamizi wa mikopo hiyo. Ameeleza kuwa Mkoa wa Singida umeimarisha mifumo ya uhakiki ili kuhakikisha mikopo inawafikia walengwa halisi na kuzuia uwepo wa vikundi visivyo halali.

Naye Afisa Maendeleo ya Jamii Mkoa wa Singida, Bi. Shukrani Mbago, ameeleza kuwa maboresho ya kanuni za utoaji wa mikopo ya asilimia 10 za mwaka 2024 yamewezesha makundi yenye uhitaji zaidi kunufaika na fedha zinazobaki katika robo husika, tofauti na utaratibu wa awali uliokuwa ukigawa fedha kwa viwango maalumu vya asilimia nne kwa wanawake, nne kwa vijana na mbili kwa watu wenye ulemavu.

Mpango wa mikopo ya asilimia 10 ni sehemu ya juhudi za Serikali za kuwawezesha wananchi kiuchumi, kupunguza changamoto ya ukosefu wa ajira, hususan kwa vijana, kuongeza uzalishaji na kujenga msingi wa kujitegemea kiuchumi. Usimamizi madhubuti wa mikopo hiyo ni muhimu katika kuhakikisha fedha za umma zinatumika kwa malengo yaliyokusudiwa na kuleta manufaa endelevu kwa wanufaika na jamii kwa ujumla.                                                                                                                           

WACHIMBAJI MADINI SINGIDA WAASWA KUEPUKA MIGOGORO NA KUZINGATIA SHERIA ZA UCHIMBAJI

Na Glory Kimaro

Mkuu wa Mkoa wa Singida, Mhe. Halima Dendego, amewataka wachimbaji wadogo wa madini na wadau wa sekta hiyo kuzingatia sheria, kuepuka migogoro na kutumia teknolojia za kisasa katika shughuli za uchimbaji ili kuongeza tija na mchango wa sekta ya madini katika uchumi wa mkoa. Wito huo umetolewa wakati wa kikao kilichofanyika katika Ukumbi wa Mikutano wa Ofisi ya Mkuu wa Mkoa wa Singida, kwa lengo la kusikiliza kero na changamoto zinazowakabili wachimbaji, pamoja na kuweka mikakati ya kuimarisha mazingira ya uwekezaji katika sekta hiyo.

Akizungumza katika kikao hicho, Mhe. Dendego amesema Serikali inaendelea kuweka mazingira wezeshi kwa wachimbaji kufanya shughuli zao kwa usalama na kwa mujibu wa sheria, akisisitiza kuwa migogoro inadhoofisha shughuli za uzalishaji na kuchelewesha maendeleo. Amewahimiza wachimbaji kutumia huduma za msaada wa kisheria kabla ya kusaini mikataba ya uwekezaji, kufuata taratibu rasmi za uuzaji wa madini na kuepuka utoroshaji wa madini ili kuhakikisha Serikali na wachimbaji wananufaika. Aidha, amewataka kuwekeza mapato wanayopata katika elimu, kilimo na shughuli nyingine za kiuchumi zitakazoboresha maisha yao na kuchochea maendeleo ya Mkoa wa Singida.

Kwa upande wake, Afisa Madini Mkazi wa Mkoa wa Singida, Mhandisi Sabai Nyansiri, amesisitiza umuhimu wa kumaliza migogoro na kuimarisha ushirikiano miongoni mwa wachimbaji ili kukuza sekta hiyo. Naye, mwakilishi wa Umoja wa Vyama vya Wachimbaji Wadogo wa Madini mkoani Singida ameeleza kuwa matumizi ya teknolojia, upatikanaji wa umeme wa kutosha, mitambo ya kisasa na mafunzo ya kitaalamu ni miongoni mwa hatua muhimu za kuongeza uzalishaji na kuimarisha ushindani wa wachimbaji wa mkoa huo.

Katika hatua nyingine, kikao hicho kimeangazia umuhimu wa kuhamasisha wachimbaji kujiunga na Bima ya Afya kwa Wote, kutokana na hatari zinazoweza kujitokeza katika shughuli za uchimbaji madini. Mkuu wa Mkoa amesisitiza kuwa uwekezaji katika afya za wafanyakazi ni muhimu katika kulinda maisha yao na kuimarisha uzalishaji, huku akiwataka wadau kuhakikisha wafanyakazi wa migodini wanapata huduma za afya wanapozihitaji.

Aidha, Mkuu wa Mkoa wa Singida ameongoza kikao cha maandalizi ya Siku ya Utalii na Utamaduni Mkoa wa Singida, kinachotarajiwa kuzinduliwa rasmi Desemba 2026 na kuadhimishwa kila mwaka. Kikao hicho, kilichowakutanisha viongozi wa mkoa na wilaya, wakurugenzi wa halmashauri pamoja na wadau wa utalii, kimejadili mikakati ya kutangaza vivutio vya utalii, fursa za uwekezaji na urithi wa kitamaduni wa Singida, kwa lengo la kukuza utalii, kuimarisha uchumi wa mkoa na kuhifadhi maadili na mila zenye manufaa kwa jamii.