BLOG RASMI YA OFISI YA MKUU WA MKOA WA SINGIDA.

"WATOTO WANAOPATA LISHE WANAFABYA VIZURI DARASANI" MWL. DULENGA

Wazazi na walimu wameaswa kudumisha ushirikiano wa karibu ili kuhakikisha elimu bora inaendelea kutolewa shuleni na kuleta matokeo chanya kitaaluma. Rai hiyo imetolewa leo tarehe 12 Februari 2026 na Afisa Elimu Mkoa wa Singida, Bw. Makwasa Dulenga, wakati akishiriki mahafali ya kidato cha sita yaliyofanyika katika Shule ya Sekondari Ndago mkoani Singida.

Mwl. Makwasa Dulenga akitoa hotuba kwa wahitimu Shule ya Sekondari Dago wilayani Mkalama.

Akizungumza katika hafla hiyo, Bw. Makwasa amesema mafanikio ya kitaaluma shuleni yanategemea mshikamano wa wadau wote wa elimu, hususan wazazi na walimu wenyewe. Amefafanua kuwa ushirikiano huo hujidhihirisha kupitia hatua mbalimbali ikiwemo uhamasishaji wa utoaji wa chakula shuleni, ufuatiliaji wa maendeleo ya wanafunzi na michango ya hiari inayowawezesha walimu wanaojitolea kuendelea kutoa huduma bora ya ufundishaji.

Aidha, amewataka wazazi na walezi kuhakikisha watoto wao wanapata lishe bora wakiwa shuleni, kwa kuwahimiza kuchangia chakula shuleni akisisitiza kuwa kuna uhusiano wa moja kwa moja kati ya lishe bora na ufaulu mzuri darasani. Amesema mwanafunzi anayepata chakula chenye virutubisho muhimu shuleni huwa na uwezo mkubwa wa kuzingatia masomo na kufanya vizuri katika mitihani.

Vilevile, Afisa Elimu amewahimiza wanafunzi kuendelea kuthamini fursa ya elimu kwa kujituma zaidi katika masomo yao, akibainisha kuwa wazazi na walezi wao wanajitoa kwa hali na mali kuhakikisha wanawapatia mahitaji muhimu ya shule ikiwemo sare na vifaa vya kujifunzia ili kuwajengea msingi bora wa maisha ya baadaye.

Awali akiwasilisha taarifa fupi ya shule hiyo, Mkuu wa Shule ya Sekondari Ndago, Bi. Prisca T. Msemo, amesema wanafunzi wa kidato cha sita wanaohitimu wameonyesha kiwango kizuri cha maandalizi kitaaluma kupitia mitihani mbalimbali ya majaribio waliyoifanya, ikiwemo mtihani wa utimilifu (Mock) wa Mkoa wa Singida. Ameeleza kuwa katika matokeo ya mtihani huo, shule ilishika nafasi ya tano kati ya shule 27 za mkoa, ambapo wanafunzi 54 walipata daraja la kwanza, wanafunzi 13 daraja la pili na mwanafunzi mmoja daraja la tatu, matokeo ambayo yanaonesha juhudi za walimu na wanafunzi pamoja na mazingira mazuri ya ufundishaji na ujifunzaji yaliyopo shuleni hapo.

Kwa upande wa baadhi ya wazazi waliohudhuria mahafali hayo wameipongeza hotuba ya mgeni rasmi na kuahidi kuendeleza ushirikiano katika malezi na elimu ya watoto wao. Wamesema wataendelea kuhakikisha wanafunzi wanapata mazingira mazuri ya kusoma ili waweze kufikia ndoto zao za kuendelea na masomo ya ngazi za juu. "Mgeni rasmi umesema maneno mazuri sana, umewahusia vijana wetu na sisi wazazi umetuhusia, basi tutashirikiana na walimu wetu. Pia nawashukuru walimu kwa kuwalea watoto wetu na ninyi watoto wetu bado kuna hatua huko mbele hivyo jitahidini katika masomo yenu sisi tuko pamoja na walimu wenu." Amesema mmoja katika wazazi.

Nao wanafunzi wa kidato cha sita wa Shule hiyo wamewashukuru walimu wao kwa malezi bora ya kitaaluma na kimaadili waliyoyapata katika kipindi chote cha masomo yao shuleni hapo. Wamesema juhudi, moyo wa kujitolea na ufuatiliaji wa karibu kutoka kwa walimu wao umekuwa chachu ya maendeleo yao darasani na nje ya darasa. Aidha, wameahidi kuwa watajituma kwa bidii katika mitihani yao ya mwisho ili kufanya vizuri zaidi na kuendeleza rekodi ya ufaulu wa shule hiyo, huku wakisisitiza kuwa wataendelea kuitunza heshima ya shule yao kwa matokeo mazuri yatakayodhihirisha ubora wa elimu waliyoipata.