Uwanja wa Kisasa wa Mpira kujengwa Singida

 

Mkuu wa Mkoa wa Singida Dkt. Binilith Mahenge leo ametembelea eneo linalojengwa uwanja wa kisasa wa mpira wa miguu lililopo Mtipa katika Wilaya ya Singida ili kuona eneo hilo na kusikiliza mipango ya Ujenzi  kutoka kwa Mkandandarasi.

Akiongea akiwa katika eneo hilo RC Mahenge amesema uwanja huo  ukikamilika utakuwa na manufaa makubwa kwa wananchi wa Singida kwa kuwa watatumia michezo kama sehemu ya ajira na kipato.

RC amebainisha kwamba kutokana na ukweli kwamba  Singida ni katikati ya nchi uwanja huo utaweza kutumiwa na mikoa ya jirani lakini hata wananchi kutoka mikoa hiyo wanaweza kuja kuangalia mpira.

Aidha RC ameagiza Mkandarasi huyo kukutana na Shirika la ugavi wa Umeme Tanesco na Idara ya maji ili waweze kubaliana kila mmoja atakapoweka miundombinu yake ambayo itarahisisha Ujenzi huo kwenda kwa kasi kubwa.

Hata hivyo amebainisha kwamba uwanja huo utakapokamilika utasaidi kuongeza uwekezaji eneo hilo na  kuongeza kipato kwa wanachi kupitia Biashara za hoteli na huduma mbalimbali.

Kwa upande wake Mkuu wa Wilaya ya Singida Mhandisi Paskasi Muragili akamtaka Mkandarasi  kuandaa wasilisho kwa viongozi  ili kuona mchoro ili waweze kuwashawishi wafanyabiashara Kuwekeza maeneo hayo kwa ajili ya kurahisisha huduma nyingine.

DC Muragili akaendelea kumhamasisha Mkandarasi kujitahidi ili  uwanja huo uweze kutumika kabla ya kuisha mwaka huu kwa kuwa kutasaida kufungua fursa nyingine za ndani.

Naye Mkandandarasi wa uwanja huo kutoka Kampuni ya Senga senga civil & building company amesema eneo hilo lina ukubwa wa ekari zaidi ya 10 ambapo kwa sasa  eneo lishafanyiwa usafi na wanajipanga kusawazisha kabla ya kujenga hosteli katika kwa ajili ya wageni.