Mkuu wa Mkoa Singida Dkt. Rehema Nchimbi ametoa rai kwa
Halmashauri zote za mkoa wa Singida kutumia Chaki (Chalk) zinazotengenezwa mkoani Singida kwa sababu mkoa unaviwanda ambavyo vinazalisha chaki nzuri na bora ambazo zinatosheleza mahitaji ya shule zote mkoani hapa ili kuendeleza viwanda na kukuza uchumi wa halmashauri na mkoa
kwa ujumla.
Rai
hiyo imetolewa jana alipokuwa kwenye hafla ya kukabidhi nyaraka za mikopo kwa
vikundi vya vijana, wanawake na walemavu wilayani Ikungi, sambamba na kukagua na
kujionea shughuli mbalimbali zinazofanywa
na wanavikundi hao wa halmashauri ya Ikungi mkoani Singida.
“Chaki zinazozalishwa ndani ya Ikungi na ndani ya mkoa wa Singida
lazima zipate soko la kwanza ndani ya Ikungi na ndani ya mkoa wa Singida, tuna
shule nyingi za kuweza kutumia chaki zote zinazozalishwa kutoka kwenye viwanda
vilivyopo ndani ya mkoa vikiwemo viwanda vyetu vya vijana wa halmashauri ya
Ikungi mkoa wa Singida”.
“Mkoa wa Singida tunaviwanda
vya chaki vya kututosheleza na tunaziada ya kuuza nje ya mkoa wa Singida”. Alisema Dkt.
Nchimbi.
Aidha, Dkt. Nchimbi amewataka Wakuu wa wilaya mkoani hapa kusimamia masoko ya bidhaa mbalimbali yanayozalishwa na vijana, wakinamama na
wenye uhitaji maalum (walemavu) na wananchi wote wa Singida ili kuinua uchumi wa viwanda kwa wananchi wa mkoa wa Singida.
Pia, ameipongeza Halmashauri ya Ikungi kwa kuweza kukusanya vizuri
mapato ya ndani na kufikia uwezo wa kuwakopesha mikopo iliyotokana na asilimia kumi ya mapato ya ndani vikundi mbalimbali
ndani ya halmashauri hiyo ya Ikungi na amewasisitiza wale wote wanaohusika
katika ukusanyaji wa mapato kuwa wakali katika ukusanyaji huo wa mapato ya
ndani ya halmashauri.
“Nawashukuru sana halmashauri kwakuweza kujipanga vizuri kwa kuweza
kukusanya mapato ya ndani hadi kufikia kutoa mikopo kwa vikundi. Kusanyeni tena
na tena, Muwe wakali sana kwa wale mliowaweka katika ukusanyaji wa mapato ya ndani na lazima vifaa vya kielektroniki vitumike katika ukusanyaji wa mapato” alisema Dkt. Nchimbi.
Kwaupande wao wanavikundi wa halmashauri ya Ikungi
waliopatiwa mikopo hiyo isiyo na riba wameishukuru Serikali ya halmashauri hiyo
ambapo wamesema kupitia mikopo hiyo itawasaidia kuinua uchumi wa wananchi wa
Ikungi pamoja na kuibua viwanda vidogo vidogo ndani ya halmashauri ya Ikungi mkoani
Singida.
Naye, Mwenyekiti wa kikundi cha Mshikamano walemavu halmashauri ya Ikungi Bw. Donald Adam Bilali, ameishukuru Serikali ya awamu ya Tano kwa kuwajali, kuwathamini na kuwaweka pamoja na kusema kupitia mikopo
hiyo familia zao kwasasa zimeongeza furaha kutokana na wakinamama kuendesha miradi yao midogomidogo inayopelekea jamii kuwapokea kwa shangwe.
“Mheshimiwa mkuu wa Mkoa naomba ufikishe salamu zetu kwa Rais wa Jamhuri
ya Muungano wa Tanzania Dkt. John Joseph Magufuli, pamoja na kwamba sisi watu wenye
ulemavu tumepungukiwa maumbile lakini
tunashusha pumzi ya faraja tunapoona Serikali ya awamu ya Tano inapotuthamini
na kuona utu wetu”. Alisema Donald A. Bilali.
Aidha, ametoa wito kwa wanavikundi wote waliopatiwa mikopo hiyo kuendesha
vikundi hivyo kwa tija kwa kuzingatia mambo makuu matatu; TARATIBU, MIONGOZO na
SHERIA ili kuweza kukopesheka tena.
Kwaupande wake, Mkuu wa wilaya ya
Ikungi Mhe. Miraji Jumanne Mtaturu amemwakikishia mkuu wa mkoa wa Singida Dkt. Rehema Nchimbi,
kuwa wataendelea kukusanya mapato ya ndani ya kutosha ili kufika malengo yaliyowekwa ndani ya
halmashauri hiyo pamoja na kusimamia viwanda vidogovidogo vyote vinavyozalisha
bidhaa katika halmashauri ya Ikungi ili kutumika ndani ya halmashauri hiyo pamoja na
mkoa kwa ujumla ili kulinda soko la wananchi wa Ikungi na mkoa wa Singida.
Halmashauri ya wilaya ya Ikungi imetoa mikopo ya shilingi
44,200,000 kwa vikundi 23, ikiwa vikundi vya wanawake ni 17 vimekopeshwa shilingi
31,700,000, vijana vikundi 4 vimekopeshwa shilingi 8,500,000 na walemavu
vikundi 2 vimekopeshwa shilingi 4,000,000.
MATUKIO KATIKA PICHA
Mkuu wa mkoa wa Singida Dkt. Rehema Nchimbi akikagua bidhaa na shughuli mbalimbali zinazofanywa na baadhi ya vikundi katika halmashauri ya Ikungi wakati wa hafla ya kukabidhi nyaraka ya mikopo isiyo na riba kwa wanavikundi vijana, wakinamama na walemavu wilayani Ikungi mkoa wa Singida.
Sehemu ya wanavikundi katika halmashauri ya Ikungi wakati wa hafla ya kukabidhi nyaraka ya mikopo isiyo na riba kwa wanavikundi vijana, wakinamama na walemavu wilayani Ikungi mkoa wa Singida.
Mwenyekiti wa halmashauri ya wilaya ya Ikungi Mhe. Ally Mwanga akizungumza wakati wa hafla ya kukabidhi nyaraka ya mikopo isiyo na riba kwa wanavikundi vijana, wakinamama na walemavu wilayani Ikungi mkoa wa Singida.
Mkurugenzi wa Halmashauri ya Ikungi Bw. Justice Laurence akizungumza wakati wa hafla ya kukabidhi nyaraka ya mikopo isiyo na riba kwa wanavikundi vijana, wakinamama na walemavu wilayani Ikungi mkoa wa Singida.
Mwenyekiti wa kikundi cha Mshikamano walemavu halmashauri ya Ikungi Bw. Donald Adam Bilali akizungumza wakati wa hafla ya kukabidhi nyaraka ya mikopo isiyo na riba kwa wanavikundi vijana, wakinamama na walemavu wilayani Ikungi mkoa wa Singida.
Mkuu wa mkoa wa Singida Dkt. Rehema Nchimbi (katikati), Mwenyekiti wa halmashauri ya wilaya ya Ikungi Mhe. Ally Mwanga (kushoto) pamoja na Mkurugenzi wa Halmashauri ya Ikungi Bw. Justice Laurence wakifurahia jambo mara baada ya Mwenyekiti wa kikundi cha Mshikamano walemavu halmashauri ya Ikungi Bw. Donald Adam Bilali alipomaliza kuzungumza wakati wa hafla ya kukabidhi nyaraka ya mikopo isiyo na riba kwa wanavikundi vijana, wakinamama na walemavu wilayani Ikungi mkoa wa Singida.
Mkuu wa wilaya ya Ikungu Mhe. Miraji Jumanne Mtaturu akizungumza wakati wa hafla ya kukabidhi nyaraka ya mikopo isiyo na riba kwa wanavikundi vijana, wakinamama na walemavu wilayani Ikungi mkoa wa Singida.
Mkuu wa mkoa wa Singida Dkt. Rehema Nchimbi ambaye ndiye mgeni rasmi akihutubia wakati wa hafla ya kukabidhi nyaraka ya mikopo isiyo na riba kwa wanavikundi vijana, wakinamama na walemavu wilayani Ikungi mkoa wa Singida.
Mkuu wa mkoa wa Singida Dkt. Rehema Nchimbi ambaye ndiye mgeni rasmi akikabidhi hati za nyaraka ya mikopo isiyo na riba kwa wanavikundi mbalimbali vijana, wakinamama na walemavu wilayani Ikungi mkoa wa Singida.
Mkuu wa wilaya ya Ikungi Mhe. Miraji Jumanne Mtaturu akimpongeza kijana Godfrey Raphael Mange, mmoja wa vijana aliopatiwa mkopo usio na riba uliomuwezesha kununua pikipiki kwaajili ya kufanyia biashara ya bodaboda ili kuongeza kipato.
Chaki zinazozalishwa na kiwanda kilichopo katika halmashauri ya Ikungi mkoani Singida.
IMETOLEWA NA;
KITENGO CHA HABARI NA MAWASILIANO
OFISI YA MKUU WA MKOA
SINGIDA
No comments:
Post a Comment