MAAFISA ARDHI, WATENDAJI WA KATA NA VIJIJI WASIWE CHANZO CHA UMASKINI WA WANANCHI - RC SERUKAMBA

 
Maafisa wa ardhi, Watendaji wa Vijiji na Kata Wilayani Mkalama wametakiwa kuacha vitendo vinavyosababisha migogoro ya ardhi ambayo imetajwa kama chanzo cha umaskini kwa wananchi wa Wilaya ya Mkalama.

Kauli hiyo imetolewa leo na Mkuu wa Mkoa wa Singida Peter Serukamba alipokutana na wananchi wa Wilaya hiyo katika ukumbi wa mikutano wa Halmashauri hiyo ambapo walimueleza kero nyingi zikiwemo za  ardhi.

RC amewataka Maafisa ardhi, na Watendaji wa Vijiji na Kata kuacha kushiriki vitendo vya uuzaji wa ardhi ambazo tayari zinaumiliki wa watu wengine na badala yake wajikite kuwashauri wananchi kuhusiana na mambo ya ardhi.

Aidha akiwa katika kikao hicho RC Serukamba alipokea kero 49 ambapo 43 zilikuwa zikihusisha migogoro ya mashamba na viwanja baina ya mtu na mtu au mtu na Serikali ya kijiji ambapo Maafisa ardhi na Watendaji wa kata na vijiji walikiri kuifahamu lakini hawakuweza kuitatua kwa namna yeyote ile.

RC Serukamba amesema wananchi wanategemea mashamba na viwanja hivyo kufanya maendeleo ya kiuchumi lakini kupitia utendaji usioridhisha wa viongozi hao wananchi wamekuwa wakipoteza mashamba yao na kusababishiwa umaskini.

"Maafisa ardhi, Watendaji wa kata na vijiji msiwe chanzo cha umaskini wa wananchi, watu wanataka kulima wengine wanataka kufanya maendeleo lakini mnawakwamisha mnaposhindwa kuwatatulia shida zao" Serukamba.

Kufuatia hali hiyo RC Serukamba amewagiza Watumishi kutekeleza wajibu wao kikamilifu ambapo amesema kwa kufanya hivyo kutapunguza kero za wananchi.

"Kila Mtumishi ajitafakari kwamba kuanzia Jumatatu mpaka Ijumaa amefanya nini katika kutekeleza wajibu wake? Kwakuwa wapo watu wanakuwepo kazini kila siku lakini hakuna anachokifanya" Serukamba

Hata hivyo RC Serukamba anaendelea na ziara yake ya kusikiza kero za Wananchi na siku ya kesho itakuwa zamu ya wananchi wa Wilaya ya Ikungi.

"Tunaanza msako wa Wanafunzi ambao hawajaripoti mashuleni"- RC Serukamba

Maafisa Elimu na Wakuu wa Wilaya Mkoani Singida wametakiwa kutumia muda wa Siku tatu kuanzia leo  kuhakikisha hakuna mtoto atakayebaki nyumbani wakati wengine wakiwa shuleni.

Kauli hiyo imetolewa leo na  Mkuu wa Mkoa huo Peter Serukamba alipokutana na Maafisa Elimu na Wakuu wa Wilaya ili kujadili hali ya usaili wa wanafunzi mashuleni.

Amesema idadi ya Wanafunzi wa Sekondari walioripoti mashuleni ni ndogo ikilinganishwa na wingi wa madarasa yaliyojengwa na Serikali hivi karibuni hivyo ni jukumu la Maafisa elimu hao kuhakisha wanasakwa popote walipo na wapelekwe shuleni.

RC Serukamba ameendelea kueleza kwamba ifikapo Siku ya Jumatatu tarehe 23 January, 2023 anataka taarifa ya kutoka kila kata kuhusu wanafunzi wangapi wamesajiliwa na wangapi bado na sababu za kutosajiliwa.

Aidha, ametoa wito kwa wazazi na walezi Mkoani Singida kuhakikisha hakuna Mtoto aliyechaguliwa kujiunga na kidato cha kwanza atakayebaki nyumbani.

"Nimejiridhisha kwamba hali ya usaiili wa wanafunzi wa kidato cha kwanza inasuasua sana, Serikali imejenga madarasa ya kutosha, imefuta Ada mashuleni lakini bado wapo wazazi hawawapeleki watoto wao shuleni hili halitakubalika" Serukamba

Kwa upande wake DC wa Iramba Suleimani Mwenda amesema bado katika Wilaya yake hali ya kujiunga na kidato cha kwanza unaenda kwa kusuasua jambo ambalo waliamua kuchukua hatua kwa kuwaita wazazi na wanafunzi ofsini kwake ili kuwasikiliza.

DC Mwenda anasema amebaini kwamba wapo wazazi wanaozuia watoto kwenda shule ili waweze kujiunga na shughuli za kiuchumi za kulima kuchunga mifugo na baadhi kutafuta ajira binafsi.

Mwenda amesema wanapenda kutumia mbinu zote zikiwemo kuwashawishi kutumia Dola kuwapeleka shule na kuwachukulia hatua wazazi watakao bainika kuwazuia watoto kwenda shule.