Sikukuu ya Wafanyakazi Yafana Mkoani Singida, Viongozi Waahidi Kuondoa Rushwa na Uzembe Kazini.

Vyama vya Wafanyakazi, Waajiri pamoja na  Takukuru wametakiwa kushirikiana ili kuondoa aina zote za rushwa ikiwemo rushwa ya ngono katika upatikanaji wa ajira mkoani Singida.

Kauli hiyo imetolewa hivi karibuni na Mkuu wa Mkoa huo Dkt. Binilith Mahenge wakati akihutubia Wafanyakazi kwenye maadhimisho ya Siku ya Wafanyakazi duniani (Mei mosi) iliyofanyika katika uwanja wa Liti mkoani hapo. 

Mkuu wa Mkoa alibainisha hayo wakati akijibu risala ya chama cha Wafanyakazi mkoani hapo ambapo walibainisha uwepo wa rushwa ya ngono katika maeneo ya kazi  katika zoezi la upatikanaji wa ajira.

RC Mahenge alisistiza kwamba katika kuadhimisha sikukuu ya Wafanyakazi mkoani hapo watumishi wanapaswa kuachana na mambo ya rushwa. "Takukuru nawaagiza mshirikiane na Waajiri pamoja na vyama vya wafanyakazi mkoani hapa ili kuondoa aina zote za rushwa ambazo zinaonekana pamoja na zile zilizosomwa katika risala na kiongozi wa vyama vya wafanyakazi mkoani hapa" alisema RC Mahenge.

Awali Katibu Tawala wa Mkoa huo Dorothy Mwaluko aliwataka Wafanyakazi kufanya kazi kwa juhudi na maarifa ili kuweza kuwatumikia Wananchi kama inavyotakikana.

Amesema kudai mishahara na marupurupu kuendane na utekelezaji wa majukumu yaliyo bora ili kuleta usawa wa vyeo na mishahara kulingana na mishahara inayotolewa.

"Nimeona Watumishia wa Serikali Mkoani hapa mkicheza kwaito na mkienda kwa Stepu kwa kupokezana  bila kukosea ikionesha umahiri mlionao Katika mchezo huo, niwaombe Stepu hizo zitumike  Katika kuwahudumia Wananchi katika ofisi zenu. Alisema Dorothy Mwaluko katika maadhimisho ya Siku ya Wafanyakazi duniani

MATUKIO KATIKA PICHA

Katibu TAwala Mkoa wa Singida Dorothy Mwaluko akizungumza na Wafanyakazi wakati wa Sherehe hizo.

Mratibu wa TUCTA Mkoa wa Singida Susan Eliamini Shesha akisoma risala iliyoandaliwa na shirikisho la vyama vya wafanyakazi Tanzania (TUCTA) mkoani hapo kwa mgeni rasmi Mheshimiwa Mkuu wa Mkoa wa Singida Dkt. Binilith Mahenge wakati wa sherehe a Mei mosi 2022.

Zawadi mbalimbali zikitolewa kwa wafanyakazi

Mkuu wa MKoa wa Singida Dkt. Binilith Mahenge (wa pili kutoka kushoto) akiongozo jopo la viongozi mbalimbali wakati wa mapokezi ya maandamano ya wafanyakazi katika kusherekea siku ya Mei mosi mkoani Singida.

Kikundi cha kwaya kutoka chuo cha Utumishi wa Umma Singida wakiimba wimbo maalum wa kuhimiza uwajibikaji katika kuwatumikia wananchi mkoani Singida. 

Burudari zikiendelea

Burudani zikiendelea