RC Mahenge atembelea Mgodi wa Shanta Gold, awataka Wawekezaji kushirikiana na Serikali

 

Moja ya eneo linalotumika katika shughuli za uchimbaji 

Wawekezaji mkoani Singida wametakiwa kushirikiana na Halmashauri za Wilaya wakati wa kuanzisha miradi ya Maendeleo ya Kijamii (Community Socially Responsibility – CSR) ili kukubaliana aina za miradi na namna itakavyotekelezwa lengo likiwa ni kuepuka matumizi makubwa ya fedha kwa kazi ambazo zingetumia fedha kidogo.

Ushauri huo umetolewa na Mkuu wa Mkoa huo Dkt. Binilith Satano Mahenge leo January 26, 2022 alipotembelea machimbo ya madini ya dhahabu yanayochimbwa na kampuni ya Shanta Gold iliyopo kijiji cha Mang’onyi wilayani Ikungi ambapo alieleza kwamba miradi yote inayoanzishwa na wawekezaji ipitie katika Halmashauri za Wilaya ambazo zinafahamu mahitaji ya wahusika na  gharama halisi za ujenzi katika maeneo hayo.

Mkuu wa Mkoa wa Singida akizungumza wakati wa ziara hiyo

Akitolea mfano kwa madarasa yalikamilika hivi karibuni kupitia fedha za uviko 19 RC Mahenge amesema kila darasa liligharimu kiasi cha shilingi milioni 20, ikilinganishwa na madarasa yaliyojengwa na Shanta Gold ambayo yamegharimu Tsh.milioni 28 kwa kila darasa.

“Kama mradi huu mngeshirikisha Halmashauri kwa kiasi kikubwa mngetumia Force Account na mgepata wakandarasi wa bei ndogo na fedha zingebaki zikafanya maendeleo mengine katika jamii. Niwashauri mshirikiane ipasavyo na Halmashauri kupanga aina ya miradi mnayotaka kuipeleka kwa jamii”, alisema Rc Mahenge.

Hata hivyo RC Mahenge akaipongeza Kampuni hiyo ya Shanta Gold kwa kutumia zaidi ya Milioni 190 kwa kupeleka huduma kwa jamii ikiwemo ujenzi wa vyumba viwili vya madarasa na uchimbaji wa visima vya maji huduma ambazo zinafaidisha vijiji vya Mang’onyi, Sambaru, Mlumbi, Tupendane na Mwau.

Aidha, Dkt. Mahenge akaitaka jamii inayozunguka mgodi huo kutumia fursa na kuwa wabunifu kwa kuanzisha miradi mbalimbali ikiwemo ufugaji wa kuku na mama lishe pamoja na kuomba ajira katika kampuni hiyo kwa kuwa kadri mradi unavyokuwa ndivyo mahitaji yatakavyoongezeka.

Awali akitoa taairifa ya mgodi Meneja wa Mradi huo Kundael Mtiro amesema mpaka kufikia sasa mradi ulitakiwa kufikia asilimia 46.14 katika utekelezaji wake lakini kwa sababu ambazo zimekuwa nje ya uwezo mpaka sasa utekelezaji wa mradi umefikia asilimia 43.62 .

Hata hivyo Mtiro  akaendelea kufafanua kwamba mpaka June, 2022 mradi utakuwa unakamilisha  robo ya nne ya mwaka ambapo wanategemea kwamba utakuwa umekamilika kwa kuwa tayari washasimika mabomba katika maeno yote yanayohusika pamoja na uchimbaji wa visima, ujenzi wa ofisi na makazi umekamilika kwa asiliami 80.

Naye Mkuu wa Wilaya ya Ikungi Jerry Muro amesema mgodi huo utainua uchumi wa Singida na taifa kwa ujumla ambapo utasisimua sekta nyingine za elimu barabara, zahanati na wananchi kupata ajira.

Amesema Wilaya imeendelea kusimamia hali ya usalama katika eneo la mradi na imehakikisha wanachi wote waliokuwa wanastahili kupata fidia zao wamelipwa kwa wakati.

MATUKIO MBALIMBALI WAKATI WA ZIARA

Ziara ikiendelea

Mkuu wa Mkoa wa Singida Dkt. Binilith Mahenge akizungumza mara baada ya kuwasili katika moja ya eneo linalotumika katika shughuli za uchimbaji 

Mkuu wa Wilaya ya Ikungi Jerry Muro akisisiza jambo mara baada ya kutembelea mradi wa Shule ya Msingi wakati wa ziara hiyo

Meneja wa Mradi huo Kundael Mtiro akitoa taarifa ya mradi

Baadhi ya Wafanyakazi wa Mgodi wakimsikiliza Mkuu wa Mkoa (hayupo pichani) wakati akizungumza nao mara baada ya kuwasili katika Ofisi za Kampuni ya Shanta

Shughuli mbalimbali zikiendelea ndani ya Mgodi wa Shanta

Moja ya Shule ya msingi iliyotembelewa wakati wa ziara hiyo

Mkurugenzi Mtendaji wa Halmashauri ya Wilaya ya Ikungi Justice Kijazi (wa katikati) akizungumza wakati wa ziara hiyo

Mkurugenzi Mtendaji wa Halmashauri ya Wilaya ya Ikungi Justice Kijazi (wa pili kutoka kushoto) akiambatana na baadhi ya Kamati ya Ulinzi na Usalama (kulia) pamoja na mmoja wa wafanyakazi wa Kampuni ya Shanta Gold wakati wa ziara hiyo.