RC DENDEGO, SERIKALI ITALIPA MADENI YENU CHAPENI KAZI.

Mkuu wa mkoa wa Singida Mhe. Halima Dendego, amewaagiza Waaajiri wote mkoani humo kuhakikisha wanaruhusu Mabaraza ya Wafanyakazi kufanyika sehemu za kazi ili kujua changamoto na matatizo yanayowakabili wafanyakazi kwa nia ya kutafutia ufumbuzi haraka matatizo yanayowakabili nia ikiwa ni kuongeza ari na ufanisi sehemu za kazi.

Mkuu huyo wa mkoa wa Singida ametoa kauli hiyo katika Maadhimisho ya Siku ya Wafanyakazi yaliyofanyika Kimkoa wilayani Ikungi Mei 1, 2024 katika viwanja vya standi ya zamani.

RC Dendego, amesema Mabaraza ya wafanyakazi yanafaida kubwa kwa sababu yanarahisisha kujua changamoto za Wafanyakazi zinazoweza kusababisha kuzorota kwa ufanisi wa kazi hivyo changamoto zikitafutiwa majawabu mapema zisaidia wafanyakazi kuongeza bidii na ufanisi kazini.

“Mimi sio Muumini wa Watu wanaovunja Sheria hivyo Waajiri Wakatakao kaidi Maagizo yangu nitashughulika nao” Amesisitiza RC. Halima Dendego.

Aidha, Mkuu wa mkoa wa Singida ameonya kuhusu Waajiri ambao hawaruhusu  wafanyakazi wao kuanzisha au kujiunga na Vyama vya Wafanyakazi na kusititiza kuwa jambo hilo ni kinyume cha taratibu na lazima likomeshwe haraka.

Kuhusu, Madeni ya Wafayakazi Mkoani Singida, Dendego amesema mkoa huo unaendelea na mchakato wa kulipa madeni ya wafanyakazi na kusema kuwa Wafanyakazi wa mkoa huo walikuwa wanaidai Serikali zaidi ya Shilingi Bilioni 1.9 na mpaka sasa Serikali imewalipa Wafanyakazi zaidi ya shilingi Milioni 700.

Amesema dhamira ya Serikali ya kulipa madeni ipo pale pale kinachotakiwa ni uvumilifu tu.

Halima Dendego amewataka Waajiri wahakikishe wanaacha tabia ya kuzalisha madeni mapya ikiwemo kuhamisha watumishi bila stahiki zao.

Kwa upande wake, Mwenyekiti wa Shirikisho la Vyama Vya Wafanyakazi  Tanzania ( TUCTA) mkoa wa Singida Bi. Agnes Lucas ameishukuru Serikali kwa kuendelea kulipa madeni ya Wafanyakazi, upandishaji wa madaraja na kuboresha mazingira ya kufanyia kazi ikiwemo kuwapatia vitendea kazi vya kisasa hali ambayo imesaidia kuongeza ari na uwajibikaji Sehemu za kazi.

MATUKIO KATIKA PICHA

Mkuu wa Mkoa wa Singida Mhe. Halima Dendego, akizungumza na Wafayakazi kwenye hafla ya kushereheka Maadhimisho ya Mei Mosi yaliyofanyika kimkoa wilaya Ikungi.

Burudani zikiendelea

Mkuu wa Mkoa wa Singida Mhe. Halima Dendego akipokea zawadi kutoka kwa Mwenyekiti wa Shirikisho la Vyama Vya Wafanyakazi  Tanzania ( TUCTA) mkoa wa Singida Bi. Agnes Lucas, kwenye sherehe hizo kimkoa.

Mkurugenzi Mtendaji wa Halmashauri ya Wilaya ya Ikungu Ndg. Justice Kijazi akionyesha tuzi aliyokabidhiwa na Mkuu wa Mkoa wa Singida Mhe. Halima Dendego kwenye Maadhimisho ya Mei Mosi.

Katibu Tawala Mkoa wa Singida Dkt. Fatuma Mganga (kushoto) akipokea zawadi kutoka kwa Mkuu wa Mkoa huo Mheshimiwa Halima Dendego, kwenye hafla ya Maadhimisho ya Mei Mosi.

MENEJIMENTI YA MKOA WA SINGIDA INAWATAKIA HERI YA SIKUKUU YA WAFANYAKAZI 2024