RAS Singida afungua rasmi Maadhimisho ya Kimkoa ya Miaka 60 ya Uhuru yaliyofanyika leo wilayani Manyoni

 

Katibu Tawala Mkoa wa Singida Dorothy Mwaluko leo Desemba 4, 2021 amefungua rasmi  maadhimisho ya miaka 60 ya Uhuru Tanzania Bara yaliyofanyika ki Mkoa wilayani Manyoni mkoani Singida katika uwanja wa Jumbe ambapo Watumishi mbalimbali walishirikishwa.

Akihutubia mamia ya Watumishi kutoka wilaya ya Ikungi, Manyoni, Iramba, Singida mjini, Mkalama na Itigi amewashukuru Watumishi hao kwa nidhamu kubwa walionesha wakati wa bonanza la michezo lililofanyika katika uwanja huo na kushirikisha michezo ya kuvuta kamba kwa wanawake na wanaume, netiboli, mpira wa miguu, kukimbiza kuku, mcho wa bao, riadha na mashindano ya kula.

Hata hivyo RAS Mwaluko akatumia muda huo kuzipongeza timu mbalimbali zilizoshinda katika bonanza hilo pamoja na watumishi walioshiriki katika michezo na mazoezi mbalimbali ambapo akawaasa kuendelea kufanya mazoezi hata baada ya bonanza kwisha ili kulinda afya zao.

RAS  Singida akawataka watumishi hao kuadhimisha miaka 60 ya Uhuru kwa kujitathimini  walipotoka walipo na wanapokwenda ili kuona maendeleo ambayo nchi yetu imeweza kuyafikia katika kipindi hicho.

Dorothy Mwaluko akaenedelea kufafanua kwamba Mkoa wa Singida unafursa nyingi ikiwemo za kitalii ambazo zikitumika vizuri zitaongeza  vipato vya wananchi na  kuboresha maisha yao.

Aidha akawataka watumishi hao kuadhimisha miaka 60 kwa kujitathmini namna wanavyoutumia muda wao kwa kutambua kwamba ni mtaji ambao kama hautatumika vizuri mafanikio hayataweza kufikiwa.

Kwa upande wake Henry Kapera  Afisa michezo wa Mkoa wa Singida akimkaribisha mgeni rasmi ambaye ni RAS Singida amesema  lengo la michezo hiyo ni  kuadhimisha miaka 60 ya uhuru na kuwajenga watumishi ki afya. 

Hata hivyo Kapera akawaomba wananchi wa Mkoa huo wanawake na wanaume kujitokeza na kushiriki  michezo mbalimbali inayoendelea uwanjani hapo kama sehemu ya mazoezi lakini kuonesha vipaji vyao.

Aidha Kapera alibainisha kwamba baadhi ya timu zilichelewa kufika uwanjani hapo kutokana na sababu mbalimbali hivyo wangeweza kuendelea na michezo mbalimbali baada ya mgeni rasmi kuondoka.

Kapera akamalizia kwa kusema  mkoa una mkakati kabambe kuendeleza michezo hiyo pamoja na kufanya mazoezi ya mara kwa mara. 

MATUKIO KATIKA PICHA WAKATI WA BONANZA

Timu ya wanawake kwa upande wa uvutaji kamba wameibuka mabingwa kwenye mashindano ya uvutaji kamba baada ya kuwavuta timu ya wanawake manyoni mara mbili mfurulizo. Timu hiyo iliongonzwa na Katibu Tawala mkoa Dorothy Mwaluko pamoja, Kamanda wa Jeshi la Polisi Mkoa pamoja na Sekretarieti ya Mkoa wakati wa bonanza 

Katibu Tawala Mkoa wa Singida Dorothy Mwaluko (mwenye miwani ) akiwa na timu ya wanawake (sekretarieti ya mkoa) wakifurahia ushindi 

Mganga Mkuu wa Mkoa wa Singida Victorina Ludovick (mwenye traki suti nyeusi) akiwa katika picha ya pamoja na wachezaji wa mpira wa miguu wakati wa bonanza

Katibu Tawala Mkoa wa Singida Dorothy Mwaluko akifungua rasmi bonanza la michezo wakati wa Maadhimisho ya Kimkoa ya miaka 60 ya Uhuru wa Tanzania Bara yaliyofanyika leo 4/12/2021 katika viwanja vya Jumbe wilayani Manyoni

Katibu Tawala Mkoa wa Singida Dorothy Mwaluko (mwenye jezi mpira) akiwa katika picha ya pamoja na Maafisa Michezo Sanaa na Utamaduni pamoja na Maafisa vijana mkoa wakati wa bonanza.

www.singida.go.tz